પોરબંદર માં તંત્ર દ્વારા ખનીજ નું ગેરકાયદે વહન કરતા ૯ ટ્રક ખનીજ સાથે સીઝ કરાયા:પોણો કરોડ નો મુદામાલ જપ્ત

પોરબંદર માં તંત્ર દ્વારા રાતડી,માધવપુર અને વિસાવાડા પંથક માં ચેકિંગ હાથ ધરી ખનીજ નું ગેરકાયદે વહન કરતા ૯ ટ્રક ઝડપી લઇ પોણા કરોડ નો મુદામાલ સીઝ કરી પોલીસ મથક ખાતે રાખવામાં આવ્યો છે.

પોરબંદર ના કલેકટર ની સુચના થી તંત્ર દ્વારા તા ૯ ના રોજ રાતડી – વિસાવાડા ગામે ખનીજના ગેરકાયદે વહન અંગે ચેકિંગ હાથ ધરાયું હતું. જે દરમ્યાન વિસાવાડા ખાતે દેવજીભાઈ મશરીભાઈ મારૂના ટ્રકમાં બિલ્ડિંગ લાઈમસ્ટોન 11 મે. ટન વહન કરતા અટકાયત કરી ખનિજ સાથે 7 લાખનો મુદામાલ,રાતડી ખાતે રમેશભાઈ વીરાભાઈ મોરીના ટ્રકમાં 10 મે.ટન અને ટ્રક મળી 10 લાખનો મુદામાલ ,રણમલભાઈ કારાભાઈ સુંડાવદરાના ટ્રક માં 12 મે.ટન અને ટ્રક મળી 8 લાખનો મુદામાલ,રાજેશભાઈ કરશનભાઈ માણેકના ટ્રકમાં 8.510 મે.ટન અને ટ્રક મળી 12 લાખનો મુદામાલ તથા ઘેલુંભાઈ હીરાભાઈ ચમડીયાના ટ્રકમાં 10 મે.ટન અને ટ્રક મળી 7 લાખ નો મુદામાલ કબ્જે કરી મિયાણી મરીન પોલીસ મથક ખાતે રાખવામાં આવ્યો છે.

જયારે તા ૧૦ ના રોજ માધવપુર ગામે પણ ચેકિંગ હાથ ધર્યું હતું જેમાં કાંધાભાઈ કારાભાઈ કડછાના ટ્રક માં બિલ્ડિંગ લાઈમસ્ટોન ખનિજ 11 મે. ટન અને ટ્રક મળી 7 લાખનો મુદામાલ,પરેશભાઈ અરજણભાઈ કરગથીયાના ટ્રકમાં 12 મે. ટન અને ટ્રક મળી 8 લાખનો મુદામાલ ,વિજયભાઈ દેવશીભાઈ ડાકીના ટ્રકમાંથી 11 મે. ટન અને ટ્રક મળી 10 લાખનો મુદામાલ ,લીલાભાઈ અરજણભાઈ ભરડાના ટ્રક માં 11 મે. ટન અને ટ્રક મળી 4 લાખનો મુદામાલ સીઝ કરી માધવપુર પોલીસ મથક ખાતે રાખવામાં આવ્યો છે.

9 જાન્યુઆરીએ વિસાવાડા અને રાતડી ગામમાંથી 5 ટ્રક પકડાયા હતા, જેમાં બિલ્ડિંગ લાઈમસ્ટોન ખનીજનું ગેરકાયદે વહન થઈ રહ્યું હતું. આ ટ્રકમાંથી કુલ 51.510 મેટ્રિક ટન ખનીજ અને રૂ.44 લાખનો મુદ્દામાલ જપ્ત કરાયો હતો.10 જાન્યુઆરીએ માધવપુર ગામેથી વધુ 4 ટ્રક પકડાયા હતા, જેમાંથી 45 મેટ્રિક ટન ખનીજ અને રૂ.29 લાખનો મુદ્દામાલ જપ્ત કરવામાં આવ્યો હતો.

આમ બે દિવસ માં તંત્ર એ ૭૩ લાખ નો મુદામાલ કબ્જે કર્યો છે અને તમામ શખ્સો સામે જીએમપીઆઇટીએસ 2017 ના નિયમો અનુસાર ધોરણસર ની કાર્યવાહી હાથ ધરવામાં આવશે તેવું જાહેર કર્યું છે.